Besteak 16 mai. 2025

Unai Garciak agur esango dio osasunismoari datorren igandean Sadarren

Kapitainak ez du Osasunan jarraituko datorren denboraldian, 25 urteko lotura izan ostean

Unai Garcia kapitainak ez du datorren denboraldian Club Atlético Osasunako jokalari gisa jarraituko. Ondorioz, 25 denboraldiko lotura amaituko du, lehen taldean etenik gabe azken 10 denboraldietan jokatu ondoren. Osasunismoak merezitako omenaldia eskaintzeko aukera izango du datorren igandean Sadarren, Real Club Deportivo Espanyolen aurkako partidaren ostean.

Unai García Lugeak (Eskirotz, Nafarroa, 1992ko otsailaren 3a) bizitza osoa eman du Osasunari lotuta. Klub honetara 2000/01 denboraldian iritsi zen Amaiur Ikastolatik benjamin taldea osatzeko. Ondoren, bere harrobiko taldeetan gora egin zuen, 2013ko ekainaren 1ean Santiago Bernabeun lehen taldearekin debuta egin zuen arte. 2014/15 denboralditik klubeko lehen taldeko kide izan da, eta sei hilabeteko utzitako-aldi bakarra izan du Tudelano Klubean. Taldearekin izan duen ibilbide luzean 214 partida ofizial jokatu ditu: 98 Lehen Mailan, 98 Bigarren Mailan eta 18 Errege Kopan. Ziklo honetan maila gorenera bi igoera, Errege Kopako azpitxapeldun bat, Europako txapelketarako sailkapen bat eta EA Sports Ligan sei egonaldi lortu ditu. Gainera, Roberto Torresek 2023ko urtarrilean alde egin ondoren, Osasunako lehen kapitaina bihurtu zen. Lan hori David Garciarekin partekatu zuen joan den udan irten zen arte, eta denboraldi honetan bakarka aritu da.

Club Atlético Osasunak bere esker ona adierazi nahi dio Unai Garciari profesionaltasun, dedikazio eta konpromiso handiko ibilbideagatik, baita lehen taldera iristea amesten duten harrobiko jokalari guztientzat eredu izateagatik ere.

Azken albisteak Guztia ikusi