Osasunak asko landutako puntu bat lortu du gaur arratsaldean Alavesen aurka. Hamar jokalarirekin ia partida osoa jokatu arren, Jagoba Arrasateren mutilek kemena atera zuten eta Alavesi aurre egin zioten. Atsedenaldia baino lehen, Ruben Garciak falta jaurtiketa bat bidali zuen zutoinera, Roberto Torresen jaurtiketa batekin. Gorritxoak indartsu mantendu ziren eta golaren saria lortu zuten kontraeraso baten ostean. Minutu batzuk geroago, Lucasek penaltiz berdindu zuen gorritxoen arean egindako zalantzazko jokaldi baten ostean.

Partidako zazpigarren minutua bete zenean, Budimirrek zutoinean jo zuen area barrutik egindako jaurtiketa, Calleriren beste saiakera baten aurretik. Hurrengo jokaldian hamar jokalarirekin geratu zen Osasuna. Rubenek area kanpoan bota zuen Deyverson eta epaileak kanporatu egin zuen. Jokaldi horrek goitik behera aldatu zuen partidaren gidoia, eta, une horretatik aurrera, Alavesek nagusitasuna lortu zuen.

Minutuek aurrera egin ahala, Osasunaren bertsioa hobetzen joan zen. Lehen zatiko aukerarik argiena azkeneko minutuan izan zen. Calleri aurkariaren area ertzean erori eta Ruben Garciak zutoinean jo du falta jaurtiketa zuzena. Aldageletatik igaro ostean, nafarrek maila onari eutsi zioten.

Torresen eskuinkada bat eta zalantzazko penalti bat

Partida amaitzeko hogei minutu pasatxo falta zirenean, Oierrek pase bikaina eman zion Enric Gallegori. Aurrelaria aurkariaren arean sartu da, eta R. Torresi pasea eman dio. 1-0ekoa eskuinkada on batekin egin du gorritxoen hamarrak. Hala ere, pozak gutxi iraun zuen. Epaileak zigorrik handiena ezarri zuen Oierren zalantzazko ekintza baten ostean. Lucasek ez zuen barkatu eta 1-1ekoa jarri zuen.

Berdinketaren ostean, partida ireki egin zen. Hala ere, markagailua ez zen aldatu eta gorritxoek landutako puntua lortu zuten jokalari bat gutxiagorekin. Berdinketa honekin, Osasunak 2020ari amaiera emango dio. Hurrengo partida urtarrilaren 3an jokatuko du Realak Reale Arenan, 18:30etan.