Osasunak ezin izan du garaipen batekin urteari agur esan. 2019an talde gorritxoaren hainbeste garaipen ikusi zituen eszenatokiak, urteko porrotik gogorrena ikusi zuen Realaren aurka, batez ere, lan handia egin ondoren seguru asko merezi zuen saria ez zelako iritsi. Donostiako taldea nagusi izan zen lehen ordu erdian, eta hiru gol sartu zituen, Osasunak erreakzionatzeko saiakera etengabeak egin arren. Atsedenaldira heldu baino lehen eta aldageletatik bueltan, gorritxoek bi kolpe gogor eman zioten Realari eta neurketan sartu ziren. Roncagliaren kanporaketan gorritxoen erreakzioa eten egin zuen, baina Chimy Avila eta S. Herrerari esker azken minutura arte borrokatu zuen Osasunak.

Bisitariek 3. minutuan eman zuten abisua area barruan Zubeldiak egindako jokaldi arriskutsu batekin. Osasunaren defentsak inoiz ez bezala sufritu zuen Liga honetan, gipuzkoarren etorrera etengabearen ondorioz. Hala eta guztiz ere, Aridanek aukera bikaina izan zuen 7. minutuan, baina bere erremateak zutoinean jo zuen. Erasoan, Osasunak irudi ona erakutsi zuen, baina defentsa lanetan sufritu zuen Realaren jokoari aurre egiteko.

15. minutuan Oyarzabalek aurretik jarri zituen bisitariak eta hiru minutu geroago Portuk 0-2koa jarri zuen. Kolpe latza gorritxoentzat. Osasuna erreakzionatzen saiatu zen hurrengo minutuetan eta Adrianek aukera ona izan zuen. Handik gutxira Ruben Garcia saiatu zen, txilenaz, gola egiten. Haren errematea gol bihurtzeko zorian egon zen, baina Remirok geldiketa bikaina izan zuen hori saihesteko. Osasunaren minuturik onenak izan ziren, bere estilo bereizgarriari eutsiz, Realak jokaldi bakoitzean zeraman arrisku nabaria gorabehera.

Odegaardek erakustaldia eman zuen lehen zatian, eta hirugarrena egin zuen falta jaurtiketa baten bidez, area ertzetik bi metro eskasera. Errematea ezinezkoa izan zen S. Herrerarentzat.

Hurrengo minutuak gogorrak izan ziren Jagoba Arrasateren taldearentzat. Bisitarien eraginkortasun izugarriak desmoralizatuta, eta odolustea geldiarazten nondik hasi oso ongi jakin gabe, hortzak estutu behar izan zituzten gorritxoek, gaitz handiagoak saihesteko. Taldeak beti erakusten duen izaera horren ondorioz, gorritxoek Reala bere arean estutuz amaitu zuten lehen zatia. Eta azken minutuan, Aridanek burukada geldiezina egin zuen 1-3koa jartzeko eta Sadar pizteko, beste behin ere ezinezkoa zena posible zela sinetsita.

Osasunaren irteera bikaina izan zen atsedenaldiaren ostean. Chimy Avilak 2-3koa egin zuen partida hasi eta hiru minutura, El Sadar erotu baten aurrean. Lehen zatian nagusi izan zen aurkaria menderatu zuten gorritxoek.

56.ean berdinketa egiteko zorian izan ziren gorritxoak Adrian eta Ruben Garciaren arteko jokaldi batean, non valentziarrak Remirorekin topo egin zuen eta honek gola eragotzi zuen. 59.ean Arrasateren mutilek beste aukera argiago bat izan zuten. Roberto Torres eskuinetik arean barneratu zen, eta bere erdiraketa Chimy Avilaren oinetara iritsi zen, aurkariz inguratuta, errematea egin eta baloiak aurkari batean jo zuen kornerrera joan aurretik. Osasunaren minutuak distiratsuak izan ziren, futbolaz, bultzadaz eta bihotzez beteak.

Realak asko sufritu zuen minutu horietan. Hala ere, orain arteko hurbilketa bakarrean, Gorosabelek denboraldiko geldiketarik onenetako bat egitera behartu zuen S. Herrera. Miranda de Ebrokoak bere eskua luzatu zuen, baloia gurutzetik gertu harrapatu eta kornerrera desbideratzeko. Gorritxoen dinamika bikain hori Roncagliaren kanporaketarekin eten egin zen. Realak hori aprobetxatu eta Isakek laugarrena egin zuen. Hala ere, lasaitasuna berehala desagertu zen, izan ere, Chimy Avilak bakar bakarrik jokaldi on bat sortu eta amaitu zuen. Aurrelariak burukada izugarri batekin baloia sareetara bidali zuen. 

Azkeneko minutuak emozio handikoak izan ziren, baina azkenean talde gorritxoak porrot batekin esango dio agur 2019. urteari.